一把刀除咗可以用嚟切水果乜乜乜，仲可以用嚟殺人，亦都可以用嚟救人。如果話收埋最多刀嘅地方，除咗刀廠，可能就係警署喇，話晒年中咁多罪案發生，刀仔又易買過槍咁多，賊仔嘅刀仔畀警察充公晒，都好正常吖。但係收埋咁多把刀，就咁擺喺度又嘥地方，可以用嚟做咩好呢？

喺英國因為有畀犯人自行繳械嘅棄置箱，所以警察就收集咗好多冇需要留嚟做證據嘅刀嘞。但係佢哋冇掉啲刀，又冇拎去回收，反而選擇咗將呢啲刀送去另一個地方，賦予呢啲武器新嘅Meaning，就係交畀藝術家砌成一個天使雕像喇。

呢個咁高嘅天使雕像用咗超過十萬把刀砌成，真係周身刀張張利呀！咁點解要用刀砌天使，唔用其他嘢呢？咪就係因為英國年中有好多人都係用刀嚟做世界囉。搞呢個雕像嘅藝術家好希望透過同警察今次合作，可以帶出和平反暴力嘅訊息，話畀大家聽如果放下屠刀，就立地成天使㗎喇～

呢個天使亦係用嚟紀念嗰啲持刀罪案嘅受害者，因為好多時悲劇可能只係一個意外，如果犯人唔係咁啱有把刀帶喺身，可能件案件就根本唔會發生?。所以奉勸大家一句，水果呢家嘢，都係留返屋企食喇，真係要食咪食啲唔使用刀㗎囉，例如吔蕉咁就Perfect池喇，畀阿蛇捉到請佢吔埋一份呀嘛～

封面圖片及資料來源：Metro