呢排啲天氣沾寒沾凍咁，如果有得揀，有邊個唔想留喺個暖笠笠嘅被竇入面直到2046吖？而最近，有隻日本狗狗竟然身在福中不知福，無論外面幾大風，佢都要出去做隻捕風的狗狗喎！一齊睇下～

嗱，你哋咪睇佢好似畀風吹到眼都擘唔大咁呀，其實呢位狗狗只係瞇埋眼享受緊涼風輕輕吹過佢啲毛毛嘅感覺啫～唔係講笑，佢啲毛毛畀強風吹都可以keep住柔順貼服不打結，仲要飄溢到每條毛毛都有生命咁，唔搵佢代言狗狗洗毛水真係嘥咗呀！

喂讚你兩句啫，你個眼神使唔使咁堅定咁有自信呀？搞到毛毛都忍唔住要唱返首小鳳姐嘅《風的季節》嚟襯托下……話時話，狗狗你吹到成嚿綿花糖咁，你怕唔怕畀風吹走㗎？

狗狗霸氣表示： 「邊係出面大風啫，係我走得快過陣風咋嘛！」

老老77，狗狗喺呢個風勢都仲可以chok到成個步驚雲咁……嗱嗱嗱，呢啲咪叫堅．一路逆風囉！毛毛強烈建議主人幫呢隻狗狗拍返套紀錄片喎喂！

封面圖片及資料來源：618_mail／twitter