自從當奴侵成功侵入白宮，真係除咗「我真係恭喜你呀」之外都唔知可以講咩好呀（唔係同侵侵講呀，係同美國人講）！大家對侵侵嘅擁戴喺互聯網嘅急速傳播，而佢都冇辜負大家嘅期望，喺世界各地唔同嘅地方用自己嘅方式刷存在感，務求達到老是常出現嘅境界！

「特朗雀」已經out喇，而家侵侵假假地都係美國總統，要襯得起佢，起碼都要有阿娥咁嘅質素啦～咪臭係呢種新發現嘅飛蛾，因為大家都有個咁上下嘅髮型，所以阿蛾就跟佢姓叫特朗蛾喇。

但係古惑的侵又點會滿足於做隻蛾呀，估唔到佢而家連飲食都撈埋，連碟刺身都同佢一模一樣呀！師傅仔真係夠晒鬼馬，搵三文魚做塊面，真係膚色皺紋都夾到絕一絕，條三文魚瘦啲都做唔到呢個效果呀～咦，如果呢堆魚生拎埋嚟整魚生飯，係咪叫做「丼撈侵」呀？啱晒嗰啲愛佢愛到想同佢二合為一嘅人呀！

但係魚生都只係表現到阿侵嘅表面，呢個回收箱就唔同呢～除咗表現到佢嘅外在，仲有侵侵豬嘅內涵呀！講緊係兩者個内涵都係咁豐富多樣啫，你諗咗去邊啫？

不過呢啲始終都唔及我國同胞嘅作品嘅，呢隻公雞咁冏冏有神，幾有當奴侵嘅神髓呀，侵侵真係畀你哋吹到漲晒喇！阿侵睇下人哋幾有你心呀，你就唔好成日鬧人哋啦，要不是黨，你又點做到紅遍全世界呢，係咪？

封面圖片及資料來源：telesurtv.net、Chen ping chun／爆料公社、FacesPics／twitter、上海日報