帶小朋友出街，最驚就係佢無啦啦唔舒服，好似流鼻血或者嘔咁呀，大人就話識得即刻掐住個鼻或者死忍爛忍唔嘔住啫，小朋友邊識㗎，話嚟料就嚟料，做家長嘅遇到呢個情況，顧得個小朋友又顧唔到其他嘢，搞到周圍污糟晒都咪話唔尷尬呀。

最近有個台灣網民就話喺捷運見到有個小朋友突然流鼻血喇，點知滴到連車廂地下都係，但係個媽咪就趕住帶小朋友落車，冇清潔返個地面就走咗。呢個時候，竟然有個外國人主動拎出紙巾烏低身抹乾淨塊血染的地板呀！血嚟喎大佬，多數人見到地板有血，就算唔行去第二個車廂，都唔會搞佢啦，呢個好心人仲要係外國人，但佢都冇當自己係台灣嘅一個過客，一樣咁愛護環境，真係好抵讚！

就算畀你真係夠膽抹鼻血，咁遇到有小朋友嘔，你九成都會彈開喇啩？但係呢個好心姐姐竟然主動遞膠袋畀小妹妹之餘，仲用埋自己條橡筋幫妹妹紥起啲頭髮呀！要做到好似佢哋咁，未必人人都得，不過下次如果真係遇到好心人，不妨親口讚下佢，唔好連欣賞人都要隔住個mon啦～

封面圖片、資料來源連結：詹益翔

延伸閱讀：搭車見到小朋友嘔，你會……？