喂呀！點解警隊淨係受狗狗玩唔受貓貓玩喎？一眾主子咁得意，就算罪犯見到都要即刻投降啦，咁好嘅人才你哋班警察都唔識招攬，真係唔識貨呀！

不過主子又點會咁易放棄成為警界明日之星嘅夢想呢？所以呢隻來自波士頓嘅主子決定直接踩入差館，等啲警察見識下喵星人嘅威力！喂，你踩場還踩場，唔使真係踩埋上人哋架車度仲留埋腳印?呀？話晒都係警察，畀下面吖⋯⋯

話咁快，差館上下就畀主子嘅魅力俘虜，班警察仲想留主子喺差館入面瞓?～嗱，想留主子喺差館入面瞓就唔該你哋同主子傾掂啲員工福利先呀下，冇返間御用宿舍都咪使旨意佢加入呀！

登登登櫈，係一間由有15年經驗嘅資深警員晚晚OT幫主子整咗嘅御用宿舍呀！有咁嘅福利，主子你可以紆尊降貴加入警隊喇啩？

「嗯，呢間屋都幾實淨，幾有品味，如果你應承餐餐有罐罐，朕就考慮加入你哋啦！」

大家聽住喇，主子而家個朵就叫「SWAT Cat」 ，即係特種部貓呀！你哋班人以後遇到主子就醒醒定定喇！

「咪郁，立即放低罐罐投降，唔係我出爪㗎！」

主子，咁你分明係搶㗎啫～而家啲休班主子真係呢⋯⋯

封面圖片及資料來源：Boston Police Department