成日都話「今時今日咁嘅服務態度係唔夠」，咁點先夠呢？等呢位台灣的士佬過兩招畀大家啦！話說，最近有台灣網民搭的士嘅時候就遇到一位勁nice嘅司機，呢位司機態度親切不但止，而且仲提供咗好多特別服務畀乘客?！一齊睇下～

大家見唔見到司機位後面呢個「12宮格」呀？入面擺咗紙巾、濕紙巾、膠布、藥油、鏡、防曬乳液、蚊怕水、即棄雨褸同司機嘅卡片等等，無論你暈車浪定係畀蚊咬、流鼻水定係驚太陽曬，總之乜嘢問題都冇有使怕！

不過話時話，點解司機要準備即棄雨褸㗎呢？乜架車漏水咩？一問之下，原來司機係因為見間唔中有過雲雨落，唔想乘客落車之後淋雨，所以咪準備埋雨褸囉！嘩嘩嘩，連呢啲咁細微嘅嘢都留意到，呢位司機真係好細心呀！

喂，大家千祈咪以為呢位司機諗住賺多幾蚊先擺呢啲嘢喺度呀，呢啲物品全部都係司機免費提供畀各位乘客用㗎！搞咁多嘢為咩？咪就係因為呢位司機尊重佢份工囉。

資料來源：爆料公社