2017年02月16日 星期四
【創意料理】我準備好食咖哩飯你先話我知呢個係蛋糕嚟？
去到茶記，又唔想食常餐公仔麵又唔想食頹到爆嘅汁汁扒扒飯，第一時間實係諗起咖哩㗎喇，又香又好味，撈飯真係一流呀！咖哩仲要千變萬化，有香辣style紅咖哩青咖哩黃咖哩，又有甜甜地嘅日式咖哩，真係日日食都唔拒呀喂～
日本有個人妻就話知道佢老公仔好鍾意食咖哩，所以早兩日情人節就特登炮製咗呢碗「咖哩飯」畀佢喇，真係好有心思呀！
不過咖哩飯日日都食得啦，話明情人節，食咖哩飯又好似唔係幾應節喎？傻豬嚟嘅，日式咖哩牛肉飯只係佢表面掩飾，其實佢真正身份係一個蛋糕嚟呀，問你死未！飯就係海綿蛋糕吖，而淋喺上面嘅，就係朱古力醬喇，夠晒應節喇啩？
朱古力醬配蛋糕實好食嘅，不過淋落牛肉度，又好似創新得滯喎，老婆我做錯咩呀，不如你直接講啦……唔使嚇到腳軟住，其實啲偽牛肉偽紅蘿蔔偽薯仔之類嘅餸，係用梨同黃桃扮㗎～
呢個咁強嘅人妻仲好大方咁post埋個食譜出嚟，等大家都可以跟住整呢碗麻甩格花旦底嘅甜蜜蜜咖哩飯畀Darling食呀！怕難度高整唔到？唔怕喎，就算你真係朱古力醬配牛肉，男朋友都要照哽㗎啦……
今年のバレンタインは、去年に引き続きそっくりスイーツ！カレー大好きな夫のためにカレーみたいなケーキを作りました～！びっくりとか通り越して呆然とされたけど…ｗｗｗ
— 隣野こねこ (@koneko_t) February 14, 2017
何はともあれハッピーバレンタイン！٩( ''ω'' )و pic.twitter.com/HgXtS3ZAFQ
封面圖片、資料來源連結：koneko_t／twitter
《創意料理系列》
