相信唔少有住過宿舍嘅朋友都知道，個公家雪櫃真係人性測謊機嚟，就算寫埋名都一樣會轉個頭就畀人食咗杯雪糕！寫埋咩「有毒」呀、「食者不舉」呀咁又點呀，有用咩？得個寫字，下次如果畀人偷嘢食，一於學下呢個網民咁做啦！

話說佢有訂開鮮奶嘅，朝早就會送到佢樓下個牛奶箱，點知最近一個禮拜，竟然有條pk日日都搶先一步偷咗佢盒奶嚟飲啵，仲要連垃圾都唔掉，留個吉盒喺度擺明話你知「我係飲咗呀你吹咩」咁樣樣，沙塵成咁，一於畀個教訓佢！

佢唔好彩喇，原來呢個事主本身就係廚師嚟，佢決定請個賊仔食辣椒呀！畀人偷嘢反而請返個賊仔食嘢，以德報怨，真係好值得學習呀！佢仲話基於廚師職業道德，事前有洗乾淨啲辣椒先煮?。

剁爛啲辣椒之後，就落埋啲鹽呀白胡椒呀大蒜呀炒埋一大鑊，再加多隻出名辣到阿媽都唔認得嘅墨西哥魔鬼辣椒加水煮一個鐘。煮完隔一隔啲辣椒，淨係要辣椒水就得喇～

之後係咪將辣椒水倒落牛奶度呀？梗係唔係啦傻豬，都話咗牛奶畀人偷晒囉，唯有連牛奶都自己整啦～將鮮忌廉同豬油撈埋一齊，再加入辣椒水就完成喇！

唔睇字嘅話真係分唔到真奶同假奶呀！真與假有何用～應該睇化～真真假假～只要相信它！

倒埋落個牛奶盒度，搵膠水黐一黐個封口就真係大功告成喇！等變梁朝偉啦你個賊仔！

​

到咗第二日，個賊仔果然又再出動偷奶飲，佢依然好冇手尾咁留返個吉盒喺度，不過今次就多咗啲嘢喺隔籬啵，原來係張道歉字條同埋200蚊人仔呀！唔知佢個嘴定張銀紙紅啲呢？Btw，一個星期嘅牛奶點使200蚊呀，其實佢會唔會飲過返尋味，想落訂以後都飲呢款加料牛奶咋？

封面圖片、資料來源連結：四郎的黑暗料理

睇埋：喺青年旅舍驚畀人偷嘢食 唯有用七國語言寫「內有毒藥」啦