講起喵星人，除咗好打耳之外，你會諗起乜嘢形容詞？都有名你叫主子啦，仲唔係高傲同cool咩？其實喵星人都係外冷內熱，我很cool但我很溫柔咁嘅。最近日本一間「通信教育」服務公司推出咗個新廣告，呃咗唔少like＆share之餘仲呃到唔少貓奴嘅眼淚㗎！

個故仔就咁嘅，喺鄉下，有個老婆婆同小黑小白兩隻喵星人一齊住，睇落好似舒舒服服，生活得幾開心咁。但原來婆婆嘅老伴過咗身，得返佢一個人（班後生梗係搬晒出城市住啦），雖然婆婆冇講出口，但係小黑小白透過婆婆望住伯爺公張相嘅眼神都感覺得到佢內心有幾寂寞。

於是佢哋就諗辦法睇下點樣可以氹返婆婆喇，佢哋參加咗個通信講座課程，趁婆婆一落咗田做嘢或者瞓咗覺，就努力咪書同埋睇碟，學下人類鍾意嘅喵星人動作，好似揈尾呀、用後腳企起呀、甚至係用軟綿綿嘅肉球幫佢按摩咁～

小黑小白真係好畀心機㗎，有時仲會互相按按嚟練習，練跳起嘅就算跌親都會繼續努力，睇到呢度已經好令人滾動！

喺聖誕節嗰晚，婆婆又突然諗起伯爺公，傷心到係咁喊……係機會喇！小黑小白即刻將苦練多時嘅招式使晒出嚟，又大力揈尾又表演行行畀婆婆睇，婆婆知道兩隻喵星人咁錫自己，終於都笑返喇！

希望婆婆同喵星人以後會好似童話故事主角咁過住幸福快樂嘅生活啦！呢個故仔雖然講唔出咩大道理，但係毛毛睇完之後覺得非常之有親切感，所以我高度推介呢條片畀各位貓奴細閱，大家準備好紙巾未呀！

封面圖片、資料來源連結：ユーキャン CMギャラリー／YouTube