喵星人一向我行我素，只要想得到嘅嘢，無論奴才點阻止，佢哋都會出盡辦法拎到為止㗎！但係再高明嘅主子，都會有失手嘅時候，最慘係唔止拎唔到，仲要喺奴才面前出醜呀陰功⋯⋯講到尾咪又係你哋班愚蠢嘅人類衰，諗埋晒啲屎橋出嚟囉！

好似呢個可惡嘅奴才，話就話怕主上有危險所以裝咗道網門唔畀佢入廚房，其實分明就係奴才想收埋啲罐罐同零食自私食咋嘛，咪以為主子唔知呀！搞到兩位主子有得睇冇得食，大膽呀你！

「哼，居居一道網門就可以攔住朕喇咩喵！」

睇嚟主子已經有晒計劃喎～不過進行計劃之前梗係要做下Research先喇，首先要試下道網門有幾實淨，主子爬唔爬到上去，個網受唔受力，55，個質地都幾好，算奴才冇買埋啲cheap嘢喇！

跟住要扮晒拎嘢咁試下下面條罅有幾闊，咁咪大概估到上面條罅嘅闊度囉，呢啲時候梗係要派個心腹行動，自己就喺後面觀察喇～

「報告大佬，啱啱試過兩隻爪伸到出去，趴低啲個頭都應該入到喎！」 

最重要係同奴才打心理戰，要令佢相信你真係拎唔到個波，淨係可以好可憐咁得個望字，咁奴才先會放下戒心㗎嘛。

哇哈哈哈哈，愚蠢嘅人類，主子搞咁多嘢等咗咁耐，就係等呢日咋！爆門行動開始！

呃⋯⋯主子呀，咁係咪叫任務失敗呀？可憐嘅主子就係咁樣卡住了，等奴才返嚟揭穿佢哋嘅驚天大計。

「奴才仲影相！快啲放朕落嚟呀喵！早知噚晚唔食晒碗糧啦⋯⋯」 

主子唔使唔開心喎，成件事分明就係奴才錯啦，竟然裝道門嚟挑釁你，又畀咁多嘢你食。再唔係就一定係地心吸力嘅錯，搞到你個肚仔墮咗落嚟卡住咗啫，55，一定係！

封面圖片及資料來源：yy221126／twitter