相信在座咁多位男士畀女朋友鬧得最多嘅說話，除咗「你都唔錫我嘅！」之外，就係「你都唔浪漫嘅！」呢句喇。喂大佬，咩叫浪漫呀，咁抽象！有人覺得睇星星就係浪漫，有人覺得送花就係浪漫，對商家佬嚟講，一定係乜都心形就叫浪漫喇，唔係二月點會有咁多心形限定商品呀？

仲心形朱古力心形牛扒？咩年代呀你！最近外國推出咗心形pizza，唔少人都訂嚟同另一半擦餐勁，又唔使出去等位等到天荒地老又經濟實惠，正呀！雖然女朋友可能會話「下，情人節你同我食外賣pizza？你都唔錫我嘅！」不過咁喎，心形喎！係心形喎！係咪即刻成件事浪漫晒先！

閉起雙眼我最掛念誰，眼睛張開身邊竟是誰……點解命運要咁殘酷？我最唔想見到嘅畫面居然咁啱喺度畀我見到佢，佢真係好樣衰呀，佢究竟叫乜嘢名呀？咩話，叫心形pizza？！生到咁樣樣你都仲好意思話係心形？

喂呀話晒女朋友都喺度，我真係唔想爆粗話你……其實話你似中咗輻射都好畀面囉唔該。

至於呢幾個pizza呢，你覺得話係個店員落錯order，定話廚師覺得呢個係心形，客人聽落個心會舒服少少呀？

算啦，想要心形pizza啫，不如大家以後都係自己整啦，學佢咁咬一啖冇咗隻角，再畀少少想像力咪當住係先囉，仲可以同另一半講「你連心形都想像唔到，咁點幻想將來呀！」

封面圖片、資料來源連結：pizzahut／twitter、distractify