雖然今日毛毛要介紹嘅達人就唔係烹飪達人，之但係佢嘅作品一樣會睇到你口水都出埋。下？唔係食物都可以睇到你肚餓？係呀，毛毛講緊嘅咪就係呢位來自日本嘅刺繡達人囉！唔係毛毛吹水，呢位刺繡達人真係繡乜都似乜㗎，唔信一齊睇下吖～

大家睇下呢碗拉麵，上面嘅拉麵、溏心蛋、叉燒、紫菜同蔥花乜乜乜……全部都係由呢位刺繡達人繡出嚟㗎！而且喺佢繡緊嘅期間，佢仲用筷子夾起咗其中幾條線，望落係咪仲加似拉麵呢？

除咗繡拉麵之外，繡蔬果同朱古力都一樣得。

將呢位刺繡達人嘅作品同真實嘅食物擺埋一齊，真係呃得下人㗎～

吖話時話，呢位刺繡達人繡啲固體食物就繡得好出色啦，咁唔知繡飲品佢又得唔得呢？

佢唔用說話嚟答大家，佢用呢杯抹茶嚟答大家。嘩！連杯抹茶上面啲泡泡都似到呢……老老77，假如有人將呢杯抹茶擺喺毛毛面前，毛毛可能真係會唔小心拎咗嚟飲！

除此之外，其實繡動物呀、排球呀、磚牆呀呢啲都一樣難佢唔到。

資料來源：ipnot／twitter（←大家有興趣嘅可以上佢twitter學下嘢㗎）