「好味時～大嗌一聲⋯⋯Qoo～」小心呀！如果你識跟住唱，就已經暴露咗你嘅年紀喇！但係個廣告又真係幾有童年回憶嘅，Qoo呢款飲品曾經喺香港好hit㗎，那些年，有段時間成班小學雞都要用Qoo樽裝水返學先叫in㗎，小息就去電腦室上官網玩Qoo果園，可惜已經此情不再喇。好彩，Qoo喺佢家鄉日本都仲有返咁上下人氣，仲keep住有出新產品?！

呢隻Qoo啫喱出咗一段時間，都仲有賣緊廣告～好似呢張海報咁，唔止話畀大家聽有邊幾隻味揀，仲溫提大家記得雪凍先食?～不過而家啲人咁叻叻豬，會唔會睇唔明嗰個係雪櫃嚟㗎？唔怕，畫到包Qoo啫喱畀冰封住咁，再寫到明雪凍好食啲咪得囉！

但係有啲叻叻豬真係唔可以睇少㗎，無論你幾努力咁喺佢嘅角度諗，你都冇可能理解到佢嘅諗法⋯⋯

好似呢位網友，佢睇完張Poster真係照辦煮碗咁雪凍包Qoo呀，將包啫喱雪入冰箱變咗冰已經好聰明㗎啦，呢位仁兄仲要連核心外圍嚿冰都抄到十足呀！究竟你係點做到㗎？

冷靜啲！放低把鉸剪先，佢係無辜㗎，有事慢慢講！呢位覺得被騙嘅網友，為咗畀大家睇嚿冰有幾堅硬，仲拎把鉸剪喺咁插，真係點插都唔入呀⋯⋯唔緊要啦，咁心急做咩啫你，其實過多十幾個鐘包嘢就自然會溶㗎啦，真係想起他朝都興奮呀！

而呢位網友並不孤單，有另一個天才飲嘢王表示，佢都係咁樣雪硬咗支烏龍茶啫。Any肥，最後呢位依圖辦事嘅朋友，掉咗嚿冰封之Qoo落地，終於成功將冰山劈開，仲話其實呢嚿嘢都幾好食嘅⋯⋯咁都算冇違反到商品說明條例吖係咪？

封面圖片及資料來源：iphone50000／twitter