好多時我哋望住狗狗都會有一種熟悉嘅感覺，一時之間又講唔出點解喎，但係到睇到某樣物件或者食物就叮一聲明白晒，原來呢班汪星人係Transformer，可以變身扮成其他物件㗎！例如好多哥基就有個超似麵包嘅屁屁，匈牙利牧羊犬就似足把地拖咁，最近就有網友就發現原來屋企養咗個冷球喇！

呢位網友見到地下有條冷，咪拎起佢睇下個條冷嘅盡頭喺邊，諗住執返個冷球囉，不過條冷點解好似咁熟口面咁嘅？佢跟住條冷慢慢行下行下，咦？乜係你呀狗狗？

「喂，你做咩掹我啲毛呀汪！」

望真啲，條冷啲毛又真係同狗狗一模一樣喎，哦～原來你就係嗰個冷球，唔怪得知平日攬住你咁暖笠笠啦～主人咪亂咁掹?呀，一陣好似拍戲咁條冷越掹越長，狗狗身上啲毛就越嚟越少，咁仲得了嘅？天氣咁凍，好易冷親㗎嘛。

真相只得一個，其實上面呢個先係呢個狗狗冷球嘅本體呀～原來主人係捉到狗狗偷玩冷球，咁啱個冷球隻色同呢隻汪星人啲毛毛一樣，咪搞到好似啲冷喺狗狗身上掹出嚟咁囉～

雖然狗狗拎咗主人個冷球玩係好百厭，但見到呢個狗型冷球咁卡哇依，主人仲邊捨得罰佢呀，咪擺佢個傻豬樣同大家開心share算囉～

封面圖片及資料來源：nana_younow／twitter