外國好興寫一樣嘢叫Bucket List（即係自己死前想做嘅嘢），咁咪可以跟住做，唔會到臨死先揼晒心口話有嘢想做又未做囉！通常啲人都係寫想去咩國家玩呀、想玩笨豬跳呀、想紋身呀咁，但呢位住荷蘭嘅99歲婆婆嘅願望竟然係想試下畀人拉？

雖則阿孫仔就唔係好明點解阿婆想畀人拉，但阿婆都成百歲啦，而家唔拉仲等幾時呀？於是阿孫仔咪去搵阿蛇幫幫忙囉，點知阿蛇一口就應承咗喎！

佢哋同婆婆度身訂造咗呢個搏拉套餐，由畀人拉去到畀人拘留喺差館，全程都有阿蛇悉心照顧，仲有警局專車接送，真係給你一次五星級嘅拘捕體驗呀！

你睇阿婆戴住個手銬幾開心，仲笑到見牙唔見眼咁呀！真係睇唔出原來阿婆你好呢味嘢呀下～

唔知班阿蛇係以咩罪名嚟拉阿婆㗎呢？唔通條罪就係佢夠玩得？當然，呢條罪就梗係唔使扣留四十八小時啦，阿婆坐陣唞夠，影埋相打埋卡，班阿蛇就送返佢返屋企喇。

有人話喺警局咁玩好似有啲離譜，Why so serious？一班阿蛇都係想還婆婆一個心願啫，只要冇影響執法同執行公義，其實法律都不外乎人情啫，係咪？

封面圖片及資料來源：politienijmegenzuid／Facebook