有好多妹豬都會嫌自己嘅男朋友唔夠浪漫，成日都淨係識交行貨，你估個個女仔都咁現實鍾意嗰啲咩Panadola㗎咩！其實女人都係想你多啲留意下佢鍾意啲咩，唔使佢下下自己開口叫你先識買啫～做男仔唔細心都唔緊要嘅，咁咪心意搭救囉，自己親手整啲小禮物，個女仔收到都係咁冧豬㗎啫～

好似呢位網友嘅男朋友咁，親手整張咁QQ嘅鬆弛熊卡畀女朋友，網友收到梗係甜到入心啦～咦，仲好似有機關㗎喎，唔通入面係啲sweet相同埋啲情深說話？傻豬嚟嘅，畀你估到仲有實派咩～

嘩！驚喜定驚嚇呀？嚇到個心都離一離呀，好地地做咩搞到鬆弛熊成隻進擊的巨人咁嘅款呀，仲要連內臟都畫到咁仔細，家陣熊仔奧妙展呀？但係網友話咁血腥嘅背後係啲好sweet嘅說話喎，呢種反差真係甜蜜得嚟又矛盾呀下⋯⋯

唔L係呀，揭去下一層仲見埋骨?，副骨仲要咿起棚牙對住你笑咁，真係一揭一驚心呀，但最驚嘅係喺骨下面都仲有一層呀，究竟由外表去到肌肉同內臟，再去到骨，下一層仲可以係啲咩呀？

原來係充滿冤念嘅靈魂呀，仲要流住滴眼淚咁望住你，好似同你講「我死得好慘呀」咁⋯⋯梗係喇，人哋一隻咁卡哇依嘅熊仔就係咁畀你一層一層剝開佢身體喎！網友記住唔好問男朋友咩構造?呀，唔係佢下次分分鐘會整張卡解剖過你睇呀～

封面圖片及資料來源：dcard