每逢屋企樓下有新舖頭開，八卦仔毛毛都一定會哄埋去湊下熱鬧㗎！除咗睇下新舖頭有咩賣、個老闆係咩人、順便睇埋舞獅之外，最重要梗係等老闆分燒肉，拎返份返屋企加餸啦！

香港人就興分燒肉慶祝舖頭開張吖，唔知出咗名創意爆棚嘅日本人又會有咩搞作呢？嘩，呢間7仔新開張，成班店員竟然爬晒上屋頂拋啲餅落嚟畀班街坊呀！咁搶鏡嘅方式都畀你諗到，以後成條街嘅生意都畀你搶晒啦！

睇下有啲咩收獲先！除咗草餅，仲有格仔餅呀、千層蛋糕仔呀咁，老實講又唔係咩好貴嘅嘢，但咁樣喺屋頂拋一拋就做到宣傳效果，好橋！話時話，做便利店店員要一腳踢就係人都知，估唔到而家要連爬上屋頂都做埋喎，受人二分四，使唔使咁搏呀師兄……

你咁諗就誤會晒喇，原來呢班7仔店員唔係被迫做啲高難度動作嚟宣傳舖頭開張，而係做緊一個叫做「散餅錢の儀」嘅傳統儀式呀～喺日本傳統習俗，當有新建築物上樑，就會喺屋頂拋啲紅白小餅落嚟，感謝神明保佑工程順利完成，同時祝福大家平安嘅～

説明しないとセブンイレブンの店員さんが狂ったようにしか見えない。#開店祝いの餅まき pic.twitter.com/XfXL4eaA1P

— okuji (winnie) (@okujima) February 28, 2017

封面圖片、資料來源連結：okujima／twitter、ssssaki1009／twitter、krk_hdsh58／twitter、nagemochi.jp