「燒雞翼～我鍾意食～」呢排口淡淡咁，不如約班Fd子一齊出嚟BBQ啦！次次去親BBQ都會發現原來朋友入面有好多燒烤達人，燒腸仔燒雞翼呢啲已經Out晒喇，識燒梗係原隻雞放入A4紙盒燒，再唔係成隻龍蝦同連埋鮑魚擺上爐度燒啦！之後仲要煲埋個腐竹蛋糖水下埋火，咁就Perfect池喇～

你以為自己已經咩燒烤奇招都見過？傻啦，畀你見到呢位網友咁燒法，真係嚇到心都離一離呀⋯⋯

嘩，做咩事咁睇唔開呀，成罐石油氣咁燒？你咁唔係叫燒嘢食，係燒你條命呀，仲要攬埋大家一齊變燒豬喎！快啲走呀，呢個毛文個罐就爆㗎喇 ！

咦，冇事喎⋯⋯個火仲要繼續冚冚聲咁燒，唔通個火係造假嘅？原來呢個石油氣罐，笨唔係裝石油氣㗎！下，石油氣罐唔裝石油氣，咁仲可以裝咩呀？

之唔係一隻香噴噴嘅燒雞囉！下面仲要整多煲菜湯，啲雞汁精華流晒落下面，連蝦落牌啲乜乜寶都可以慳返唔使落呀～

原來網友個fd改造咗個石油氣罐，仲整多咗個架，可以插住大大隻雞嚟燒。放入去個罐入面燒，唔止可以留返啲雞汁煮嘢~ 又唔怕個表面畀火燒焦變咗燒粟米咁橋，真係好聰明呀～唔知燒乳豬得唔得呢？嗱，以上呢啲危險動作，係受過專人訓練㗎，家庭觀眾唔好亂學呀，唔係成班人去BBQ，畀慈母以為你恐怖襲擊就唔好啦係咪？

封面圖片及資料來源：楊龍少