【係洋蔥呀】老師用7個鐘頭畫晒全班同學喺黑板當係畢業禮物

雖然而家用電話上網溝通好方便,就算畢咗業,大家由日日都見變成好久不見,都仲可以喺Facebook睇到對方近況,同舊同學感覺上唔係分開好遠咁,不過,喺畢業禮嗰日,聽到《Today》呀、《我們的紀念冊》呀呢啲歌,都難免一時感觸到喊出嚟嘅~畢業禮係人生中重要嘅一日,有咩心底話、有咩禮物想送,真係要趁呢日表達心意呀。

圖片來源:hamacream/twitter

個個畢業禮嗰日淨係諗到冇得成日見到班書友仔、冇得喺球場跑嚟跑去、冇得再偷偷地𥄫隔籬班個男神女神……有冇一秒諗到老師先!有,咪就係為咗唔使畀訓導檢查校服而暗爽囉!

不過如果畀著呢位美術老師教,班馬騮第日大個咗,都一樣會返嚟母校搵佢飲茶啫,事關佢親手畫咗幅《魔女宅急便》嘅黑板畫賀同學仔畢業呀,幾有心思呀!

圖片來源:soccerkaito8821/twitter

《魔女宅急便》黑板畫就想鼓勵同學仔學小巫女咁努力追尋夢想吖,想信呢幅全班福,一定係想大家好好記住中學嘅美好回憶喇。有另一位老師喺畢業典禮前一日,用咗足足7個半鐘頭畫晒全班33位同學出嚟,有人露齒笑、有人瞇瞇笑,相信老師平時一定好留意每位同學嘅個性,用心同佢哋相處喇。

圖片來源:soccerkaito8821/twitter

畫喺黑板,就算第二日校工叔叔姨姨唔捨得擦咗去,過咗一個暑假,始終都要抹乾淨嘅。同一個班房,又會有一班新同學嚟到上堂,全班福黑板畫消失咗,但相信課室入面發生過嘅片段,將會永遠印喺班同學仔心中。

 

 

封面圖片、資料來源連結:soccerkaito8821/twitter

《這是你的畢業禮系列~》
【好靚呀】老師親手畫《魔女宅急便》黑板畫賀同學仔畢業

【青春真可愛青春】日本學生扮綠色兵仔去大學畢業禮

【喊死人咩】地盤佬砌字賀學生畢業

 

毛記電視網站 · 版權所有 · 不得轉載 Copyright © TVMOST.COM.HK All rights reserved