【係愛呀】6歲妹妹用開生日會嘅錢請流浪漢食飯

人愈大,就愈冇衝動慶祝生日,嗰日只係想同屋企人齊齊整整食餐飯就算,甚至一啲都唔想人哋提起你又老一年呢個事實。不過回想返細細個嘅時候就相反喇,生日好似中六合彩頭獎咁興奮呀,仲要前一日就話晒畀全班同學聽「我聽日生日喇我聽日生日喇我大個仔喇我大個仔喇」咁𠻹呀!咁又係嘅,生日又有得食蛋糕又有得同屋企人、好朋友開party玩遊戲,難怪咁期待嘅!

圖片來源:Fox 32 Chicago

好多人都覺得生日嗰一日自己就係主角,全場最charm,做所有嘢都以自己為先嘅,不過美國有個6歲小妹妹Armani Crews就唔係咁諗喇,佢竟然主動向爸爸媽咪提出一個破天荒嘅idea,就係用開生日會嘅錢嚟開一個大食會,請區內嘅流浪漢食飯呀!

圖片來源:Fox 32 Chicago

開頭爸爸媽咪都以為阿女只係玩玩下,點知佢生日前講足幾個月,話希望有需要嘅人可以同佢一樣,食到party上嘅嘢食,真係嚟真㗎。

圖片來源:Fox 32 Chicago

喺Armani小妹妹生日嗰日,佢哋一家人就用咗300蚊美金喺公園開呢個另類生日會,買齊意粉、蛋糕等等,同流浪漢分甘同味喇。當地教會知道之後,都準備咗牙刷牙膏等等嘅日用品送畀大家。

圖片來源:Fox 32 Chicago

Armani小妹妹雖然唔係好夠高,不過都好努力分嘢食畀大家,真係好乖女!你知唔知呀,你係全場最可愛㗎,但就唔係因為你頭上嘅皇冠,而係因為你嘅愛心呀!

圖片來源:Fox 32 Chicago

老實講吖,毛毛就不嬲都覺得生日唔係同朋友劈酒或者同BB豬放閃嘅日子,而係好好答謝阿媽生自己出嚟嘅日子嚟。雖然Armani小妹妹冇特別提到多謝媽咪,不過相信媽咪見到阿女細細個已經咁識諗,一定都好安慰啫~

 

 

封面圖片、資料來源連結:Fox 32 Chicago

《人間有愛系列》
【邊個咁走寶】被悔婚新娘照搞Party 招呼露宿者
【愛心100%】送禮物畀露宿者唔使用劍嘅 扮忍者咪得囉

 

毛記電視網站 · 版權所有 · 不得轉載 Copyright © TVMOST.COM.HK All rights reserved