一年容易又DSE，話咁快就開始咗考試嘅季節喇，相信咁多位考生上戰場之前都會做好準備：溫好書、食個醒神早餐、執齊身份証同准考証，拎實本Last minute 就出發喇！點知噚日喺濕滑嘅公路上，竟然有個大意嘅的士司機，車錯考生去試場呀！

呢個不幸嘅學生哥喺「名校 Secrets」度post話佢要去「瑪利諾xx神父學校」考試，點知個司機帶錯咗佢去「瑪利諾xx修女學校」喎！去錯地方都已經夠晒打擊自信啦，最崩潰嘅係佢仲要冇晒錢，真係想飛的都唔得呀！就喺佢最無助嘅時候，好彩有個校工知道佢去錯試場，乜都冇講，即刻就拎一嚿水出嚟畀佢搭的士，真係好偉大呀！同學仔，你記得要搵日去還錢同多謝返人哋呀！

btw，毛毛淨係搵到「瑪利諾神父教會學校」同「瑪利諾修院學校」，並冇同學仔講嗰兩間……anyway，大家唔熟路嘅話，真係最好搵日踩咗線先去考，的士叔叔都會有唔識路嘅時候，求人不如求己。

咁warm嘅事唔止一單㗎，有另一個喺自修室埋頭苦幹嘅同學仔都話，有次佢溫溫下書，突然有人掉咗張卡仔畀佢，原來上面寫咗幾句鼓勵說話呀！雖然唔識得對方，不過大家喺得同一個自修室溫習，都算係半個戰友吖，大家加油呀！DSE無情，人間有愛！

封面圖片、資料來源連結：名校 Secrets