【潰已崩】急住開大你仲叫我夾廁紙?

人生最無奈嘅一刻,莫過於你急sss衝入去個廁所,好舒暢咁讓一百隻大笨象奔騰,然後發覺廁所冇廁紙呀!但係「原來沒有~從來都沒有~」,都好過你睇得到啲廁紙但係攞唔到吖,係咪?呢幅相就完美咁示範咗咩叫做世界最遙遠嘅距離喇!

圖片來源:林桃

_你個街呀,夾公仔機嚟嘅喂?台灣呢個廁所啲廁紙唔止睇得到但掂不到,仲要冇咁上下功夫都唔使旨意夾到呀!邊個咁大整蠱呀?仲要話10蚊包夾中喎,夾得嚟都黃河決堤啦~最重要嘅係⋯⋯周身冇銀用呀!邊個去廁所會帶咁多銀仔呀!嗚呀,好酸呀啲廁紙!

就算有散銀,屙完見到冇廁紙先嚟夾⋯⋯即係要冒住一褲sss嘅危險企起身去夾⋯⋯(高八度)我接受唔到囉!其實如果夾唔到,都應該出到去嘅⋯⋯你明白點解洗手盆要喺個廁格入面未呀?Btw,究竟係夾極都夾唔到會崩潰啲,定係開完大先發現最後一包都已經畀上一手夾埋會崩潰啲呢?

圖片來源:baakin01/twitter

圖片來源:css_pink/twitter

對比呢個有得睇冇得用嘅廁紙地獄,日本驚安之殿堂簡直就係開大嘅天堂呀!咁多卷廁紙任君選擇,就算你洶湧到好似尼亞加拉瀑布衝擊咁都肯肯定夠用呀!

可惜,呢個廁所係日本限定,香港嘅廢青表示都係慢慢捽軟個廁紙筒罷啦⋯⋯

封面圖片及資料來源:林桃baakin01/twittercss_pink/twitter

回帶:【驚安之廁所】成格都係廁紙 用邊卷先好呢?​

毛記電視網站 · 版權所有 · 不得轉載 Copyright © TVMOST.COM.HK All rights reserved