【動感柴柴】主人你唔好襯我揈緊頭嘅時候影我得唔得呀汪?

聽講,世上有兩種人嘅電話特別容易快用晒儲存空間,一種係自戀妹豬,無論等緊𨋢食緊飯定試緊衫都要自拍,成個相簿都係佢嘅照騙(雖然同一個角度);另一種就係有養寵物嘅人喇。作為一個稱職嘅小主人,梗係要兼職埋自己嘅汪星人嘅私狗攝影師,時時刻刻幫佢影靚相啦~

圖片來源: shiba_yuzukichi/twitter

對主人嚟講,汪星人就係佢心肝寶貝,無論佢覺覺豬、打喊露、定屙緊便便個樣,都係咁打耳,一秒都唔可以錯過㗎!呢隻汪星人就使出緊柴柴電鑽呢招喇,呢個moment真係可遇不可求㗎,主人你唔好講咁多喇,快啲影低先啦,一陣佢鑽完就冇㗎喇!

圖片來源: shiba_yuzukichi/twitter

咦喂,面容扭曲咁樣樣嘅?同頭先隻靚仔柴完全唔同feel喎,唔好趁自己隻狗狗行開咗,就即刻影其他狗咁花心先得㗎!

圖片來源: shiba_yuzukichi/twitter

「主人……你唔好襯我揈緊頭嘅時候影我得唔得呀汪?你影到我好似傻仔呀!仲有本汪警告你唔好又post上啲咩狗狗group度呃like呀,下次落街見到旺財佢哋,實畀狗笑到面都黃!」

圖片來源: shiba_yuzukichi/twitter

真係估唔到,原來呢隻肥肉橫飛、眼都逗雞埋嘅狗狗,同頭先嗰隻係同一隻嚟喎!所以話,時影相除咗要識搵角度,仲要啱timing呀,唔係點用美肌app執都幫你唔到㗎喇!

 

 

封面圖片、資料來源連結: shiba_yuzukichi/twitter

 

毛記電視網站 · 版權所有 · 不得轉載 Copyright © TVMOST.COM.HK All rights reserved