【強國風情畫】仲用鑽石?求婚梗係用隕石啦!

求婚呢樣嘢,好彩就一世人得一次,唔好彩就⋯⋯Any肥,當一世人一次先啦,點都應該搞得浪漫啲嘅,咁先氹到妹豬落搭之餘,仲會令佢一世難忘㗎嘛~求婚方法有好多種,不過唔係樣樣都講個心就得㗎,有啲item都係最低消費嚟㗎喇,起碼有花有戒指先吖,你有錢嘅咪買返層樓或者買多架車囉~

等啲人仲成日以為自己送18卡嘅鑽石戒指就好威豬,正一傻西瓜嚟嘅,而家仲送鑽石㗎咩?人哋興送隕石㗎喇!

圖片來源:中國新聞網

新彊有個男人,為咗氹妹豬嫁畀佢,用成百萬人仔買咗嚿33噸重嘅隕石呀!咪就係喺後面拎塊紅布冚住住嗰嚿囉~唔講仲以為係啲乜乜紀念碑嘅揭幕儀式𠻹。

邊得嚟咁有創意,又邊度嚟咁大嚿隕石呀喂?是咁的,主角劉生同女友之前去旅行,男友見女友咁鍾意睇嗰套講三生石嘅愛情劇,又聽聞有個當地人屋企收埋好大嚿隕石,咪問女朋友去唔去睇下囉,女友本來都唔多想,但係男朋友堅持去睇,睇完仲問女友鍾唔鍾意𠻹~

大佬,你咁問到,唔通女友話唔鍾意咩,係咁意答句鍾意,咁就出事喇!原來男友一直記住呢件事,仲靜靜雞買埋返嚟求婚呀!btw,有專家話嚿隕石應該係假㗎喎 ,是但啦,有心咪得囉,55。

圖片來源:中國新聞網

你估真係「隕石旁的天際,是我的家園」咩,咁大嚿石可以點擺返屋企呢下?你實以為咁唔實際,女友會唔受啦,錯喇!女友竟然say yes呀!你以為個個都有樓先有高潮咩?有啲女人就係鍾意你記住佢講過啲咩,記得佢提過鍾意啲咩,然後瞞住佢買返嚟,咁先係最冧最surprise呀!

圖片來源:中國新聞網

最緊要嘅係,使得出成百萬買嚿所謂嘅「隕石」,仲要唔使煩嚿石擺喺邊度,你慌人哋冇錢買樓咩,當然如果佢用晒成副身家嚟買嚿石就⋯⋯有網友問,乜啲同胞唔係好驚輻射㗎咩?傻啦,你見唔到日本仲有大把操純正普通話嘅同胞咩?

封面圖片及資料來源:中國新聞網南華早報

毛記電視網站 · 版權所有 · 不得轉載 Copyright © TVMOST.COM.HK All rights reserved