【唔好咁黐線啦】臨換新機 梗係要同部PS3開心埋最後一晚啦

喺呢個速食年代,咩都嚟得快去得快,痴心情長劍?好難搵喇。唔好以為毛毛講緊成日換畫嗰啲playboy呀,毒L都一樣有花心嘅權利!手提電話都一年換一部啦,有得打PS4,唔係仲攬住PS3下話?

圖片來源: goooooripi/twitter

不過日本呢個網民就唔同諗法喇,佢買咗部PS4之後,當然要同舊戰友PS3講再見啦。話晒部PS3都陪佢經歷過咁多空虛寂寞凍嘅晚上,令佢喺打機嘅過程搵返自信同人生意義,點可以是是但但賣畀收買佬或者掉出門口咁衰仔㗎?

圖片來源: goooooripi/twitter

圖片來源: goooooripi/twitter

就算決定咗同第三者一齊,要同大婆分開,如果可以嘅話,多數人都應該想好嚟好去,同大婆開心埋最後一晚嘅……於是,呢個網民就帶阿3出街街,同佢留低美好回憶喇。佢哋兩個一齊喺冇人嘅街上踩滑板,好似重拾初相識嘅青澀感覺咁呀。

圖片來源: goooooripi/twitter

圖片來源: goooooripi/twitter

佢驚阿3會凍親,仲特登幫佢戴埋冷帽,真係好細心呀……
阿3:「其實你仲關心我㗎係咪呀!點解要分開呀!我唔明呀唔明呀!」

圖片來源: goooooripi/twitter

唔好咁啦,發生啲咁嘅事,大家都唔想……阿3一直咁喊呀喊,喊到攰,終於都喺主人個被竇入面,聞住佢最熟悉嘅氣味瞓著咗。可惜,主人已經決定咗要同阿4展開新生活,唯有選擇喺阿3進入夢鄉嘅時候靜靜離開佢……好多女仔都唔鍾意男朋友打機,不過打機打到好似呢個咁情深深,都算係半個暖男吖?

 

封面圖片、資料來源連結: goooooripi/twitter

 

毛記電視網站 · 版權所有 · 不得轉載 Copyright © TVMOST.COM.HK All rights reserved