【被遺忘的時光】放咗17年嘅C.C. Lemon竟然仲放上網畀人Bid?

古乳有暈,凡事太盡,緣分勢必早盡。好多人以為啲嘢擺得越耐就越好,其實就算係紅酒,都唔係款款都擺得㗎,有啲擺得耐仲會變壞𠻹!更何況係其他有賞味期限嘅嘢(例如女神)呢?不過有啲時候,擺到啲嘢過期,大家都唔想嘅,只係唔小心唔記得咗佢啫⋯⋯

圖片來源:日本Yahoo拍賣

好似呢支畀遺忘的C.C Lemon,從未開封,喺床下底放咗超過17年,真係C.C. Lemon中嘅XO呀!佢仲要由圓柱變咗三角柱,由淡淡嘅黃色變成神秘莫測嘅黑色⋯⋯

圖片來源:日本Yahoo拍賣

冇花冇假,寫住喺2000年到期,為2000年3月13日生日嘅你而設,別具收藏價值!你以前冇,但你將來會想有!

圖片來源:日本Yahoo拍賣

日本網民從來都唔自私嘅,呢支珍藏又點可以自私嘆呢?梗係要放上網同大家開心share啦,仲要喺Yahoo度畀大家Bid,開價都只係17萬円,計返都只係萬二蚊港紙度就買到呢支陳年佳釀,係咪好抵呢?心動不如行動喇!得返幾日咋!

咁Po上嚟賣嘅網友都係一位良心賣家嚟嘅,講到明不建議飲用,淨係叫啲C.C. Lemon嘅 Fans買嚟收藏下,再唔係拎嚟做研究好喇~一班網民都即刻返屋企尋寶,將自己唔小心珍藏嘅嘢飲PO上網,仲話冇諗過原來C.C. Lemon已經出咗咁多年喇⋯⋯

圖片來源:wkwklover/twitter

圖片來源:wkwklover/twitter

見到網友呢兩支珍藏咗15年樽裝Qoo,毛毛突然都覺得自己老喇⋯⋯呢兩個熟悉嘅樽蓋,你又有幾耐冇見過佢哋呢?

封面圖片及資料來源:日本Yahoo拍賣wkwklover/twitter

毛記電視網站 · 版權所有 · 不得轉載 Copyright © TVMOST.COM.HK All rights reserved