有人話金魚得唔知7秒定30秒記憶，呢頭食完嘢覺得飽飽，嗰頭一見到魚糧就會以為自己未食，又游埋去食多餐，或者唔會記得自己游咗去邊，所以就算個魚缸幾細，佢都會以為自己喺一個新地方游緊水喎。是咪真㗎呢，毛毛就唔知喇，淨係知就算失憶都好，都一樣會有感受，想做條開開心心游嚟游去嘅金魚仔！

好可惜，呢條金魚仔患咗魚鰾病，唔可以正常平衡身體，成日都淨係側側地咁沉喺水底，咩心機都冇晒。就算佢努力游到上水面，都只會慢慢向下沉……魚唔識游上水，同條鹹魚有咩分別呀？仲有呀，魚糧都係浮面㗎嘛，佢都游唔到上去，唔通只可以慢慢餓死？

好彩，有個好心哥哥Derek見佢咁慘慘，幫佢整咗個金魚專用輪椅！其實之前都試過有人用木塞整「魚堅尼」畀金魚仔㗎喇，而今次嘅好心人，就用發泡膠同埋膠管整喇。條膠管喺下面輕輕托住金魚仔，最頂就綁住一粒發泡膠，幫金魚仔平衡身體同埋浮起，佢而家終於可以自由自在咁游水水喇～

大家見到金魚仔而家游得返水，都好開心，仲有朋友特登幫佢畫咗幅靚畫?！

其實主人仲有養其他魚㗎，就好似呢條嘟嘴侵侵咁吖……唔知佢係咪諗緊明明自己咁靚仔，但就冇輪椅金魚咁出名，所以個樣咁嬲嬲豬呢？

How wheelchair goldfish gets suited up for his day pic.twitter.com/AbwoOrpdRn

— Taylor Nicole Dean (@taylorndean) March 15, 2017

封面圖片、資料來源連結：taylorndean／twitter

同場加映：

【係愛呀】主人見我老游唔到水 整救生衣畀我呀！

【係愛呀】金魚哽石仔 主人使500蚊美金都要救返佢