2017年03月17日 星期五
【係父愛呀】絕世好老竇為阿女親手整紙皮瀡滑梯
有時做女人嘅真係好矛盾，好想老公錫晒自己，唔好出去搵第個女人，但係呢個世界上有一個第三者，就算老公幾錫佢你都冇得呷醋，嗰個就係你個女喇！唉⋯⋯未生嘅時候就想有個囡囡，可以幫佢扮靚陪佢買衫，但生咗之後，畀呢個老公嘅前世情人爭晒寵，真係唔知嬲好定笑好呀！
就算你老公幾懶都好，只要對住阿女，就咩都肯陪佢玩陪佢做，你個衰佬，以前叫你打少陣機陪老婆行街都唔得呀！
台灣呢個阿爸唔止會同個女玩，仲要一手一腳用紙皮砌個瀡滑梯出嚟?！仲要絕對唔係嗰啲偷工減料用紙皮摺兩嘢就算嘅豆腐渣工程，係精心設計過個結構㗎，保證囡囡玩得安心又放心～等毛毛帶大家睇真啲啦！
呢位廿四孝阿爸用咗個幾禮拜畫圖、切割同裝嵌，全部一手包辦，真係少啲耐性都唔得呀～ 佢好似起屋咁用紙皮入榫，一層層咁砌上去，唔係一層比一層鬆化，係一層比一層用心就真！
整得咁辛苦，都係想阿女開心啫～好多阿爸阿媽都想畀最好嘅嘢小朋友，但係對小朋友最好嘅，咪就係父母嘅愛囉，只要你睇少陣電話，好好咁陪佢玩下，聽下佢講今日有咩開心唔開心，就算你唔識好似呢位阿爸咁整玩具畀囝囝囡囡，佢哋都一樣咁開心㗎～
封面圖片及資料來源：Michelle Lu
《廿四孝老竇D.I.Y.系列》
