電影開場之前如果早到咗，可以點做？仲使問嘅，首選梗係去交定水費先啦，交完都仲有時間，咪睇下捨唔捨得畀多嚿水買杯可樂同爆谷囉，再唔係咪望下個大mon有咩新片預告睇囉。講咁耐，好似都冇提過欣賞下牆上一幅幅嘅電影海報喎？咁又係嘅，上網都有得睇啦，有咩咁特別啫。

但係如果你有機會去到台南全美戲院，就一定要擘大對眼睇清楚佢門外掛住嘅電影海報喇！點解要條路迢迢遠去到台南？事關嗰度嘅大型電影海報，都係由顏振發師傅親手畫出嚟㗎！冇錯，就係畫出嚟，而唔係一式一樣咁print出嚟喇，所以幅幅都係獨一無二嘅作品，每筆每劃都係師傅心血結晶嚟㗎～

呢幅348cm闊、522cm高嘅超像真《你的名字。》手繪海報由六塊木板拼成，本來電影落畫之後，師傅就會用顏料將木板油咗去，再喺上面畫另一套電影嘅海報嘅，環保吖嘛。不過呢幅《你的名字。》手繪海報曾經喺台灣成為打卡熱點，戲院覺得就咁油咗佢又大嘥，所以就放上賣，睇下有冇知音人帶佢返屋企，話咁快就以30000蚊台幣（即係7000幾蚊港紙咁上下）成交喇。講真，毛毛都好想買返屋企囉，如果屋企夠大……

呢個post出咗一日，就已經有識貨之人將大作買咗喇。如果香港都多啲人咁重視本地文化、尊重藝術，咁就好喇。

封面圖片、資料來源連結： 全美今日戲院手繪看板文創研習營

睇埋：【係勁嘅】同學仔畫晒成幅《你的名字。》海報