【出賣同事】教你由Office枱面睇人乜嘢打工格

最近幾位年過半百嘅職場老前輩,為咗爭份筍工,施展渾身解數,仲教精咗一班廢青好多職場知識𠻹。嘩,我哋真係學咗好多嘢呀~嗱嗱嗱,學咗嘢就要學以致用喇,為咗令你哋更加清楚了解明白箇中玄機,毛毛不惜冒住生命危險,深入龍潭虎穴,出賣各位同事嘅枱頭!

第一型: 整齊型

圖片來源:毛毛被賣同事1號

枱面乾淨整潔嘅同事真係世上難得。最聰明嘅地方係用過去咁多期嘅100毛雜誌砌成銅牆鐵壁,除咗可以防止對面同事入侵自己嘅領土之餘,仲可以向公司表示忠誠,呢招高呀!

 

第二型: 少宅型

圖片來源:毛毛被賣同事2號

古乳有暈,少少宅,多多趣。記住,少少好嗱下,放自己心愛嘅模型喺枱頭,做嘢都醒神啲啦!如果唔想畀人定型做宅男,不妨學下呢位同事咁,放返幾本書喺枱頭巴L時下,扮下文青,呢種咁矛盾嘅枱頭,好明顯係要顧及自己喺公司啲女女面前嘅形象啦~

 

第三型:為食型

圖片來源:毛毛被賣同事3號

呢位同事完美示範咩叫朝廷不用餓兵,枱頭食物儲備仲充足過庫房呀!食物嘅種類唔使多,但一定要有花生!事關Office乃係是非之地,隨時花生供應短缺,擺定一樽花生喺枱頭就萬無一失啦!你以為同事淨係識食?錯晒!零食除咗係糧食,仲可以收買人心㗎嘛,雞髀打人牙骹軟你都唔識?

 

第四型:操勞型

圖片來源:毛毛被賣同事4號

呢張Office枱⋯⋯相當有嫌疑。成張枱都係紙巾,仲要有個性感女郎月曆平放喺枱面。根據毛毛9估嘅精探頭腦,一定係有人拎起過個月曆,然後有大量液體流出!你諗咗去邊呀?係見到冇假放嘅3月仲有個幾禮拜先完,Sad到喊呀!

圖片來源:毛毛被賣同事4號

睇真啲⋯⋯哦⋯⋯原來同事傷風,一定係平日太操勞,所以病咗嘞,呢啲同事記得要鍚住佢呀知冇?

綜合上述咁多個枱面,你會發現,張張枱都冇紙嘅?傻啦,而家除咗Work Hard,仲要Work Smart㗎嘛,都轉晒用電腦,仲邊度有人用紙㗎啫~至於部電腦呢⋯⋯嗱,知得太多係好危險㗎下,話晒大家都係努力扮工嘅打工仔,乖,唔好話畀腦細知好冇?

毛記電視網站 · 版權所有 · 不得轉載 Copyright © TVMOST.COM.HK All rights reserved