那些年當你還會打開部電視煲劇嘅時候，好多時睇完第二日返學校咪臭係傾最新劇情囉，仲要睇到上晒腦，FF自己係主角，仲想懶係浪漫咁買同劇集同款嘅嘢?！之前新彊有個男人為咗氹好鍾意某套劇嘅女朋友，就買咗嚿「隕石」做「三生石」喇～唔好笑人啦，當年大家仲年少無知嗰陣，下面呢堆嘢夠hit到周街都係啦！
《戀愛世紀》－水晶蘋果
悠長假期梗係經典啦，但係跟住出嘅戀愛世紀都瘋魔當年好多少男少女，特別係嗰個水晶蘋果，賣到周街都係，就連地攤車仔都有得賣，你想要咩色都有呀！嗰陣個個示愛都係拎住個水晶蘋果，亦都有好多戲同電視節目惡搞同改篇咗呢套劇啲橋段㗎，香港仲曾經出咗一套《新戀愛世紀》，係由明蝠俠做主角?！
《四葉草》系列第一、二輯－所有有四葉草嘅飾物
老老77, 未播四葉草第1輯同第二輯之前你知唔知四葉草係咩？咪草囉！明明周街都係三葉草，如果唔係睇完四葉草，有幾多個人知四葉草四塊葉代表咩希望、信心、愛情同幸運呢啲咁嘅嘢吖。
當年，呢兩輯青春主打嘅劇集一出，成個MK都係四葉草頸鏈、四葉草鎖匙扣，總之周圍都係四葉草乜乜乜，第二集出咗之後仲突然多咗好多妹豬走去打沙排?！不過出到第三集，四葉草已經風光不再，但係四葉草型嘅首飾到今日仲有啲Market嘅～日本仲興緊呀嘛～
《流星花園》－流星頸鏈（第一集）、流星戒指（第二集）
「陪你去看流星雨落在這地球上～」，講起青春點可以唔講F4！流星花園當年真係Hit 到街知巷聞，連Uncle嘅鈴聲都要轉埋好似庾澄慶嘅哈林唱嘅情非得已呀！而嗰陣MK仔必備嘅媾女神器，一定係呢條流星頸鏈啦！
「如果我愛你只有你愛我的十分之一，那你還願意跟我交往嗎？」
「那我們在一齊後，我會努力把另外九分補齊」
加埋呢段對白，仲邊度有得輸呀！不過首先⋯⋯你要有道明寺咁有型先囉⋯⋯去到第二集嘅流星介指一樣咁受歡迎，當時仲有好多妹豬都冇理得一隻戒指係會帶嚟惡運嘅設定，跟住走去買嚟自己戴⋯⋯
《十萬噸情緣》－太陽花
呢套劇有好多人都未必記得，但係呢堆花你有印象喇啩，話晒由影帝張家輝主演嘅愛情小品，仲自己唱埋主題曲呀喂！歌神化骨龍終於可以一展歌喉啦！雖然當年有啲批評話套劇似係幫郵輪賣廣告，但係風車山放紙摺嘅太陽花呢幕，真係可以話係經典，唔止令大家對風車山呢個地方產生興趣，仲令好多人傻更更上網去學摺太陽花氹女女?，同金莎花有得揮㗎！
《衝上雲霄》－Triangel（第一集）、心鎖手鈪（第二集）
講定情信物一定唔可以唔講呢隻被詛咒的信物Triangel！第一集佢都仲係一隻緣分公仔， 因為衝上雲霄第一集而爆紅，個個妹豬都話想要一隻，單身嘅就想快啲搵到個好似Sam哥或者阿Belle嘅另一半，一Pair嘅就想有個守護天使，學套劇公仔訂情咁話喎。不過正版要過千銀一隻喎！所以就周街都見到中國陶瓷版嘅怨念Triangel⋯⋯
你班人咁搞法，唔怪得第二集嘅Triangel就好似受詛咒嘅公仔咁，去邊個度就死邊個啦⋯⋯ 反而第二集就跑出咗Holiday帶嗰隻咁咁心鎖鈪喎，最後發現原來喺Luk福贊助，三萬蚊對⋯⋯不過錢呢個問題又點會難到要呃蝦條嘅MK仔呢？ 一個星期唔使，淘寶與Holiday同款，三嚿有交易！不過都係嗰個問題，分手唔見咗條鎖匙咪又係盞搞⋯⋯要學咪學下人哋去古堡打下野戰咪算囉，香港冇古堡？廢屋都差唔多啫，好似係。
有冇發覺，有好多都係某大台嘅出品呀？曾經，佢哋可以帶起啲熱潮，但而家，你仲記唔記得對上一部成班人一齊追嘅電視劇，係邊套?
