【唔L係啩】科大生因為考試狂放屁要扣10分?

成日話女神唔放屁,傻豬嚟嘅,你估佢真係神咩,唔講你唔知呀,原來正常人平均一日會放成14個屁咁多㗎!冇人嘅時候放都還好呀,聞下自己啲屁仲不知幾有安全感𠻹,最驚就係喺一個靜嚶嚶嘅封閉空間,例如搭𨋢嗰時,突然呠一聲,劃破寧靜吖嘛……

如果真係不幸遇上呢個情況,都唔係話冇得救嘅,毛毛根據入選放屁唔認屁港隊多年嘅經驗,有以上心得,大家不妨參考下。

老老77,搭𨋢放屁都算好㗎喇,有咁多補救方法,最慘係考緊試先嚟放屁呀!放完你咩都唔可以做,只可以默默承受背後同學嘅目光(雖然睇唔到不過都feel到),一邊紅都面晒一邊繼續努力衝份試卷……

圖片來源:UST FYS Secrets

噚日就有個科大同學仔話自己收到Email,話有其他同學投訴佢之前喺考Midterm嗰時狂放屁,唔止臭親人,仲嚴重影響到其他同學,所以要扣佢10分喎!消化唔好已經夠慘啦,仲要扣分,唔通老師驚佢用屁聲嚟做摩斯密碼出貓咩?

大家唔使咁擔心住,科大已經話咗查無此事喇,唔知今次係改圖定又社會實驗呢?不過呢封假Email都令毛毛深受啟發,等我今日開始都唔食生果唔食菜,試下用屁聲通水,話畀同事知腦細返到公司先!

 

 

封面圖片、資料來源連結: UST FYS Secrets

 

毛記電視網站 · 版權所有 · 不得轉載 Copyright © TVMOST.COM.HK All rights reserved