細個老是常失蹤嘅排行榜第一名一定就係擦膠！有幾多個人係可以用晒成嚿擦膠冇唔見到㗎，做到真係係要頒個獎畀佢呀！唉⋯⋯點解擦膠要離家出走？梗係啦，你哋班人成日剝佢光豬又搵鉛筆喺咁篤佢虐待佢喎，有冇諗過佢嘅感受呀？你哋對擦膠好啲啦，其實佢哋好有內涵同哲學嘅意味㗎，你睇下呢嚿就明㗎喇。 

日本東京有一間個別指導學院（即係類似香港啲補習社啦下），送咗嚿擦膠做促銷商品，網民睇完即刻感覺到背後嗰份淡淡嘅哀愁呀，因為呢嚿唔係普通嘅擦膠⋯⋯

係一個「夢」字嘅擦膠呀！拎住呢嚿擦膠係咁擦，越畀心機讀書，個夢字就消失得越快，個夢就越嚟越唔成形，嗚⋯⋯真係好Sad呀⋯⋯

但係又真係好鬼反映現實喎，以前我哋以為自己只要努力讀書就會同夢想越嚟越近。不過人越大，讀得越多書，反而我哋就會慢慢忘記或者不自覺咁違背咗自己嘅夢想。其實我哋係咪真係冇得揀呢？係咪一定要犧牲夢想呢？用過第嚿擦膠，或者唔擦，劃走佢得唔得呢？

有另一個網民就話除咗夢字，其實佢都見過森字嘅擦膠㗎⋯⋯就好似地球上嘅森林咁，擦嗰陣唔覺，成日覺得有排用，原來擦擦下，個森林就唔見咗喇⋯⋯

計毛毛話，唔覺唔覺消失嘅又點止夢想同森林呀，應該出埋下面呢幾款就差唔多！

呢兩嚿就啱晒月頭出糧，月尾啲錢就唔知用晒去邊嘅朋友買嚟警剔下自己喇⋯⋯唔係呀，唔係講緊毛毛自己呀！嗚⋯⋯都唔明白點解，份糧摵下摵下就唔見晒，用得仲快過嚿擦膠呀！

不過最有警世作用嘅都係呢款擦膠，係呀⋯⋯呢十幾廿年，香港好多有特色嘅嘢都慢慢消失，曾經何時，一眾港豬以為呢嚿擦膠可以簡約地擦足50年都不變，但原來，擦下擦下係真係會咩都冇晒㗎。

畀著係你，你會想要一嚿咩字嘅擦膠，送畀邊一個人？你仲諗到有啲咩係慢慢消失，而我哋總係事後先發覺㗎？

封面圖片及資料來源：hiroGT1000／twitter