世上有一種執著，叫做「自己間房亂到狗竇咁都唔執但就發姣執人哋啲嘢」。不知幾多女女間房入面呢件一件衫嗰度一條底底都唔執下，但一去到男朋友度就阿媽上身咁幫佢大掃除呀！毛毛都一樣㗎，不過就唔係執女朋友間房，而係執超市啲貨啫……呢種咁擇善整齊嘅人，最好就係做以下呢份工喇！

每間公司都有不為人知嘅混亂一面，而網上呢個小員工，就畀佢腦細點咗去處理呢個情況喇……嘩，呢堆意粉咁樣樣嘅係咩嚟呀？咪臭係光纖線囉！腦細竟然叫佢梳理好呢堆打晒結嘅光纖線呀陰公！

啲光纖線一早已經亂到唔知邊條打邊條，不如都係一嘢剪晒佢，砍掉重練算罷啦。

個哥仔就話，最開頭有32束光纖線嘅，咁佢就慢慢整理啦，每次佢抆咗個頭，就會有人上唔到網，佢一次過抆晒32個，咪大家都上唔到網咁囉。

佢用盡畢生嘅眼力同耐性，將啲一嚿嚿嘅光纖線分返開同埋固定，睇嚟情況都比起第一步進步咗好多喇喎。

日子一日一日咁過去，佢已經由生晒白頭髮，魚尾紋都出埋嚟……講笑啫，佢用咗足足9日，終於都成功將堆光纖線整理好喇！其實佢話唔係100％滿意㗎，不過腦細話已經收貨，佢咪停手囉～

辛辛苦苦整理完，唔知過多排堆光纖線又會變成點呢？將啲相由最低睇返上去咪知囉……

封面圖片、資料來源連結：ihearnipple／imgur