做貓奴除咗要努力賺錢買罐罐畀主子，仲要剷屎同埋睇主子面色，真係好唔容易㗎，壓力咁大，又難怪佢哋有時會唔記得自己係奴才嘅身份，捉住主子嚟玩嘅！不過主子大人有大量，咪畀你攬下錫下咁囉，間中仲送次肉球Massage過你嘆，做奴才嘅就應該感恩啦！

估唔到而家啲奴才越嚟越離譜 ，連有得摸下主子都唔心足，竟然仲玩弄主子完美嘅Body！

「大膽奴才！朕個頭係畀你用嚟擺雪糕㗎咩！」

一二三四五六⋯⋯仲要放8杯雪糕咁多？作死你呀，一陣凍親主子個頭頭或者畀啲雪糕砸親咁點算呀！不過主子果然係主子，無懼世事變改，都仲喺度坐到定一定，驚都未驚過呀～

「由得你玩一次咁多啦！記得一陣開返幾個罐罐畀朕呀喵～朕恰陣先⋯⋯」

真係主子都冇你咁好氣～不過睇真啲，以毛毛9估，呢個貓奴分明就係想借主子過橋賣廣告頂喇！一定係，除非唔係，唔係點解特登用同一隻牌子嘅supercup仲要款款唔同味?，貓奴記得分返份廣告費畀主子啵～

原來貓奴係想撩大家一齊玩Supercup Challenge，一齊呃下like啫～大家放心，呢個貓奴都好錫住主子嘅，啲雪糕都食晒，得個盒㗎咋，仲洗乾淨咗㗎喇～同埋貓奴都溫提咗其他奴才，如果主子唔想做呢個Supercup Challenge，就千祈唔好逼主子做喇～始終主子嘅心情點都重要過呃like嘅係咪？

封面圖片及資料來源：mrfukusuke／twitter