城市人日日唔係留喺公司就搭車，講真都冇咩機會細心欣賞下周圍嘅植物（雖然都冇乜），所以喺屋企植啲細細盆嘅植物，當陶冶下性情又好，當護眼又好，都唔錯㗎～如果盆植物個樣得意啲，可以當埋裝飾咁就perfect喇！

咦喂，明明講緊植物㗎喎，你畀堆海豚我做咩呀？仲要係綠色㗎?，中咗輻射呀？睇真啲先啦，原來係盆栽嚟㗎！絕冇改圖㗎，呢種植物叫做「三爪上弦月」，因為生得似海豚咁樣樣，所以又叫做「海豚弦月」。

平時見到啲兔仔花唔似兔仔、拖鞋蘭唔似拖鞋，不過呢種海豚弦月就真係夠晒似海豚喇！佢本身嘅形狀好似個肥肥地嘅彎月咁，加埋突出嚟嘅小三角，十足十跳緊出水面嘅海豚呀！

海豚弦月咁打耳，係咪都好想養返盆呢？唔好以為佢好難養呀，海豚弦月屬於多肉植物，一兩個禮拜澆ㄧ次水就OK，啱晒想美化Office嘅打工仔呀～

見到啲咁打耳嘅綠色海豚，就諗起原本可以喺海入面開開心心咁跳嚟跳去嘅中華白海豚喇。千祈唔好畀777見到啲海豚弦月呀，都唔知會唔會踩住嚟影相㗎……

めっちゃイルカ！！！ pic.twitter.com/uugHKVwumY

— かお (@kao77neko) March 24, 2017

封面圖片、資料來源連結：kao77neko／twitter、香港政府新聞網