黑面、拒載、兜路、唔過海……好多人都因為呢堆原因而唔鍾意搭的士，不過原來一直以嚟，仲有一個原因畀人忽略咗，就係……搭嗲！平時搭地鐵如果撞到唔熟嘅朋友，都話可以走去另一卡或者死都扮睇佢唔到呀，而家喺個細細嘅的士車廂入面，司機叔叔一開口撩你傾偈，真係避都冇得避……

日本京都最近試辦嘅「沉默的士」服務就真係社交冷感人士嘅福音喇！除咗大家溝通去邊度之外，司機叔叔都唔會主動撩乘客傾偈，留返啲空間畀大家。不過當然啦，如果調返轉係個乘客悶到喊，想同司機叔叔嗲返幾句，佢都會好有禮貌咁回應你嘅～

好多時候搭得的士，唔係趕時間返公司就係想早啲返屋企瞓個靚覺，如果趕時間又點會有心情同司機叔叔傾今日天氣好唔好呀？如果係攰到隻狗咁，仲邊有力同佢傾自己做邊行呢，仲有呀，你同我媽叉前面架車唔識打燈都冇用㗎，我淨係想合埋眼唞下咋司機大佬……所以話呢，個「沉默的士」服務都真係幾貼心㗎，唔知美容院或者髮型屋幾時可以引進呢個咁偉大嘅服務呢？

封面圖片、資料來源連結：The Huffington Post、Miyakotaxi／instagram