成班FD子出街食完飯，明明食到最尾個個都話飽曬㗎嘛，但一起身呢，就總係有條友仔話不如一齊食埋糖水先㗎啵。話就話重點唔係糖水，而係想傾多陣先走啫，都總要畀錢㗎嘛，頭先打邊爐就兩嚿水，跟手食個焦糖布甸又成三四十蚊，嘩，真係呢……

7仔賣杯布甸十幾蚊就有交易，抵食好多囉，不過就係爭咁塊脆脆焦糖！為咗塊焦糖畀多一倍錢又唔多化算，一於就DIY啦，鬼叫你窮呀頂硬上！自製焦糖布甸？仲要係有塊薄脆，唔係得焦糖醬嗰種啵？個做法就人人都識嘅，不過唔係人人屋企都有火槍吖嘛，好唔方便咁喎？

所以今日就要同大家分享一個勁簡單嘅做法喇！首先打開杯布甸，灑少少白砂糖喺面～（聽講學Nusret Gökçe咁用手踭撞一撞啲糖會好食啲，得閒可以試下。）

主角出場喇，冇錯，就係一隻鐵匙羹！唔係叫你而家即刻潷嚟食呀傻豬，係開著個爐，用火輕輕㷫熱佢呀～（溫提：鐵匙羹傳熱快，應該用毛巾包實先好啲，廢事燙傷吖嘛。）

㷫熱完隻鐵匙羹，就可以對杯布甸進行烙刑喇！一嘢焫落個軟綿綿嘅布甸度，就算佢出曬煙，係咁叫救命都唔好理，直到啲白砂糖變做一層薄脆焦糖為止！

燈燈燈凳！一分鐘都唔使，你就已經成功將一個十幾蚊嘅雞蛋布甸升級做幾十蚊嘅焦糖布甸喇，caption記得寫法文「Crème brûlée」呀，係咪即刻high class曬呢！

另外都有路過網民搭嗲，話將布甸煮溶咗再浸麵包落去整布甸多士都好好食㗎，真係超邪惡呀！估唔到原來布甸可以有咁多玩法呀下，你哋手下留情，唔好掃曬啲布甸呀，毛毛都想今晚收工買返個整嚟食下呀！

どうしてもグラニュー糖でやってみたかったこと pic.twitter.com/xJLXQXofLS

— 推しがしんどい甲羅さん低浮上 (@PRpy8veMpF3rf67) April 17, 2017

封面圖片、資料來源連結：PRpy8veMpF3rf67／twitter、TAMA177114／twitter