主子嘅傲嬌屬性令人類完全捉唔到路，當你想抱下佢嘅時候，佢就唔知走咗去邊，但係你忙到飛起唔得閒嗰陣，佢又會衝過嚟扭抱，真係好難捉摸呀！

最近有網友就分享咗一項震驚十三億貓奴嘅開心大發現，原來只要用一卷膠紙就可以喺任何地方成功召喚主子㗎喇！

材料好簡單，首先你要準備任何顏色嘅膠紙一卷，主子一隻。然後喺你需要主子出現嘅地方黐一個方形嘅框。跟住你只要靜心等待⋯⋯

主子就會自動走入個框度坐低㗎喇！So Amazing！一眾貓奴即刻發揮科學嘅求真精神，搵屋企隻聖上做下實驗先！

「我做緊啲咩呀？點解我會喺度㗎？」

主子GET！睇嚟呢個方框嘅魔力實在太大，連聖上自己都唔知發生咩事呀！

古乳有暈，一框不能藏二喵！估唔到方框嘅威力大到令兩隻喵皇要爭奪地盤呀！

雖然有好多人Post相表示實驗成功，但係都有失敗嘅例子⋯⋯

好似呢個2/3失敗咗嘅實驗，得一隻主子畀面佢入個框咋，另外嗰兩隻仲要用鄙視嘅眼神望住奴才。

有主子就睬你都有味，眼尾都唔望一下個框，仲搵個背脊對住奴才呀陰功⋯⋯

仲有貓奴試勻唔同形狀，最後發現咩形都唔夠紙箱吸引。不過都唔及以下呢個貓奴慘，主子唔止突破框框，連個框框都畀佢拆埋呀！

「區區一個框就可以困得住我喇咩喵！成個世界都係朕嘅！」 

最估唔到都係連外國網站Pinterest都玩埋一份，用方框圍住個同事，咦～要用召喚喵星人嘅方式嚟召喚呢位同事，唔通呢個同事都係傲嬌一名？

封面圖片及資料來源：prograpslady／twitter