自動販賣機話就話又叫做汽水機，但你估真係得汽水賣咁簡單咩，一早就已經有埋零食同杯麵賣啦，咁都不特止呀，有啲連花都有得賣，真係你諗得出嘅都有！喺自動販賣機買嘢，都不外乎係入錢／嘟卡、撳掣、拎貨，成個過程都冷冰冰咁，但係估唔到最近日本就出現咗部充滿人情味嘅自動販賣機啵～

人情味？睇過？呢部自動販賣機嘅外表冇乜特別，都係機一部囉，不過入面賣嘅嘢就好唔同喇，係摺紙作品嚟呀！最頂嗰行有女兒節娃娃、鯉魚旗咁，就賣30円；中間嗰行就睇得又玩得，有識跳嘅青蛙、個口可以合合下嘅烏鴉等等，就賣50円；最底嗰行紙飛機呀、紙飛鏢等等只係賣10円咋，真係好抵玩呀！

雖然賣得好平，不過一啲都唔係hea嘢嚟㗎，啲花紙襯過晒唔同pattern，好有日本feel！啲摺紙作品仲要用個膠盒仔裝住，唔驚喺部機度跌落嚟嗰陣會整爛，夠晒細心！

點解一開頭話呢部自動販賣機好有人情味？因為啲摺紙作品原來係由一位61歲婆婆整㗎，佢仲特登準備咗個袋仔掛喺部機度，等大家收到摺紙作品之後掉返個膠盒仔落去，畀佢回收再用?～部機咁迫，婆婆要坐喺入面創作，又要收銀仔找錢，真係辛苦晒喇！

ドライブの途中、気になっていた内子町のおりがみ販売機へ。作品は10円から50円。いろいろかわいい◎ pic.twitter.com/zvYMqEMwgn

— ぼん (@bon_chic) April 8, 2017

封面圖片、資料來源連結：bon_chic／twitter、rocketnews24