【夠晒應節】終於搵返9年前阿爸阿媽收起嘅復活蛋喇!

話都冇咁快,4日嘅復活節假期就已經遠離咗我哋喇嗚嗚……講起復活節,除咗放假去旅行之外,你仲會諗起啲咩吖?畀啲童真嚟啦,係復活蛋呀!你估個個都有錢紅日嘅時候飛咩,都係喺屋企食下朱古力,玩下復活蛋算罷啦。

圖片來源:Reddit McReddit/YouTube

圖片來源:Reddit McReddit/YouTube

外國就好興同小朋友玩找尋復活蛋遊戲,將啲復活蛋收喺屋企或者花園,再等班細路搵餐飽嘅,最近有個網民就咁啱搵返隻好耐以前阿爸阿媽收起嘅復活蛋喇!有幾耐?之唔係2008年嘅囉,嘩,數一數手指,即係足足成九年前喎!佢話阿爸阿媽2008年嗰時就擺咗啲傢俬喺士多房,呢排竟然喺個咕𠱸後邊搵到隻復活蛋呀!

圖片來源:Reddit McReddit/YouTube

嗯,2008年雨水充足,陽光普照,葡萄豐收(ok其實唔關事),呢隻復活蛋經過年月嘅洗禮,一定比當年更加成熟有韻味……一於就劈開佢嚟睇下啦!

嗚呀!係發曬黴,有白色一點點嘅黑色蛋呀!

圖片來源:Reddit McReddit/YouTube

可能你心諗朱古力復活蛋擺得耐最多咪唔食得,使唔使咁大反應呀?咁諗你就錯曬喇,毛毛必須要強調,呢隻係真雞蛋嚟㗎!平時啲烚蛋擺三日唔食都一陣臭屁味啦,而家擺足九年,你話會係幾大陣臭屁味呢!唔講住喇,隔住個mon都覺得有陣味攻緊出嚟咁呀,毛毛都係去搵個防毒面罩嚟戴一戴先!

 

 

封面圖片、資料來源連結:Reddit McReddit/YouTube

毛記電視網站 · 版權所有 · 不得轉載 Copyright © TVMOST.COM.HK All rights reserved