陪人去賣電腦同手機嘅舖頭，無聊冇嘢做又有排等，最好係做咩呀？梗係試機啦～試機又唔使錢，唔係咁都唔試下話？除咗玩部機有嗰啲Game，試機梗係要試埋個影相鏡頭啦！

好似呢位阿姐咁，喺咁喪影，唔同角度唔同表情都要影幾張，咁先知部機係咪點影自己都咁靚㗎嘛～影完做咩唔Del相？傻的嗎？影得咁靚梗係要同大家開心share啦！

有台灣網友呢兩日就去咗間咩都有得賣嘅超市行街，行過堆陳列嘅蘋果，居然畀佢見到一件偉大傑作呀！

係一部用自拍照做桌面嘅iPad呀！你睇下呢個可愛嘅（死）肥仔，嗰兩個生猛嘅鼻哥窿，同個片濕潤嘅豬唇，呢個表情真係好引人犯罪⋯⋯係人見到都想揼佢呀！

小朋友你又係嘅，你影到張相咁誘人，上一手個路人甲見到點忍到手唔轉做Wallpaper啫～行過嘅網友仲忍唔住影低Post上網同大家分享，而家呃咗超過3萬個like呀！而家最紅係你啦，啲女都畀你溝晒喇！

呢個故事教訓我哋⋯⋯下次見到人哋試機留低自拍相，你知點做啦～人哋咁想紅，咪幫下人當日行一善囉～冇咩事，毛毛想出去Del返啱啱用同事部機影嗰啲自拍相先。

封面圖片及資料來源：胡燿、我的父母是個奇葩／微博