次次有潮牌同明星合作，啲商品都會賣到斷晒市，梗係啦，除咗本身品牌啲忠實擁躉，都仲有嗰個明星班Fans爭住買呀嘛，況且有啲產品又真係出得幾靚嘅～

好似Puma x Rihanna出嘅蝴蝶結拖鞋咁，平時啲波鞋幾靚都好，女神好難用嚟襯啲Girly嘅衫㗎嘛～但呢對絲帶加緞面嘅波鞋，本身就夠晒公主啦！著住佢易襯衫得嚟又舒服，咁咪行足全日影靚相都唔怕攰囉～Yeah！

最新消息話呢個系列嚟緊夏季又出新嘢喇，唔知今次又係啲咩呢？

竟然係一對膠拖呀！唉，潮流嘅嘢，我哋識條巾咩？夏天要去沙灘同陽光玩遊戲，梗係著返對膠拖方便啲啦！不過因乜事對膠拖咁熟口面嘅呢⋯⋯

係屋企廁所對透明膠拖呀！等你班衰仔仲成日笑阿媽唔識Fashion，阿媽一早就走在時代嘅尖端喇！仲唔快啲睇下邊度買平啲，入返一堆貨然後擺上網賣？記得寫明同 Puma x Rihanna同款拖鞋，咁就肯肯定商機無限喇！

撞款嘅嘢係Fashion界其實成日都有㗎啦～冇耐啲人先發現Balenciaga 巴黎世家出嗰個新袋同姨媽傢俬個賣5蚊嘅購物袋一模一樣呀！

所以話你啲人真係大驚小怪，啡唇呢家嘢同氣質一樣，都係來自生活㗎嘛，咁咪夠晒貼地囉！仲唔快啲去掃返幾對透明膠拖同買個姨媽購物袋做今季潮童？

封面圖片及資料來源：Hypebae、Ikea官方網頁、淘寶、Sneakernews