每逢假期⋯⋯呀唔係，係每日先啱，每日開facebook、instagram都會見到有fd子去咗旅行。到底點解呢啲人可以有咁多錢同咁多假去旅行㗎呢？嗚哇，真係令人好葡萄呀！嗱，假如你唔想硬受旅行曬命彈，想喺屋企都可以反擊嘅話，咁就要跟以下呢位爸爸學下嘢喇。

話說，最近有台灣網民話阿爸突然拎咗佢架模型飛機去⋯⋯喂，乜阿爸你都鍾意玩模型飛機㗎咩？原來阿爸無啦啦拎咗阿仔架模型飛機唔係要嚟玩，佢係借架模型飛機嚟影相，扮自己搭緊飛機，然後send去group度同fd子講佢有得去出國去旅行呀！

大家睇下，模型飛機嘅機翼加上藍天白雲，係咪同大家平時喺facebook、instagram見到嘅曬命相有幾分相似呢（咁當然個角度仲可以較返好少少啦⋯⋯）？咁嘅計仔都畀呢位爸爸諗到，係醒嘅！

不過呢，呢位網民喺facebook將阿爸條好橋同fd子分享嘅時候好似順手tag埋阿爸㗎喎⋯⋯嗯，天空海闊我共你～再領略人生的美～雲外看～花生脆！

資料來源：感謝網民 Boryau Hsupeng 同意轉載