一個人為咗紅可以去到幾盡？有人直播食sss，有人會用黃鱔自……我安慰，睇到都不禁想問一句，有冇想紅成咁呀！古乳有暈，運氣嘅嘢話嚟就嚟，個天要你紅嘅話，就算你冇諗過，都會無啦啦爆紅㗎！聽落好似對啲畀心機搏出位嘅人好唔公平，但偏偏呢個世界真係有啲人咁好彩㗎！

好似Carter哥咁，佢好鍾意食Wendy's快餐店嘅雞塊（同麥樂雞差唔多啦），餐餐都想食雞塊乜乜乜，於是咪上Wendy's快餐店個Twitter問下佢哋，一個普通人出Post要有幾多Retweet（ RT），先可以得到佢哋嘅免費食一年雞塊大獎囉～

又估唔到Wendy姐姐真係會答佢喎，嘩，要成18mRT，18m即係1800萬喎，而家Twitter上面最多RT嗰個Post都係3百幾萬RT，Carter哥，人哋擺明叫你死咗條心啦！

Carter哥話晒對雞塊都有一份執著，邊有咁易放棄㗎！所以佢就Post喺Twitter叫大家幫手喇！

正所謂，網上有情，點都估唔到唔夠一個月，已經有3百萬人響應Retweet喇！同全球最多RT嘅奧斯卡Selfie相爭十零萬RT咋！話晒人哋個Post都已經兩年時間，仲要有咁多粒星一齊影先有3百幾萬RT，你一條友講兩句，一個月就追到咁貼，叫一班明星情何以堪呢？

難怪連Ellen DeGeneres都要請Carter哥上自己個Show度同佢Selfie啦～Carter哥今次威啦！

而家Carter哥個Account有埋Twitter官方藍剔認證，佢仲開埋網站賣#NuggsforCarter做主題嘅Tee，真係商機無限呀～不過Carter哥唔係為咗賺錢㗎，所有賣Tee嘅收益都會捐去慈善機構，咁有心，抵你紅嘅～

雖然距離1800萬仲有好大段距離，但係話晒今次Carter哥幫Wendy's做咗個咁好嘅宣傳，Wendy姐姐應該都唔會虧待佢嘅。唉，你哋就玩得開心啦，難為環球影城嘅Twitter管理員，個個都有樣學樣走嚟問佢幾多個RT可以拎全年入場證呀陰功！

封面圖片及資料來源：carterjwm／twitter、theellenshow／twitter、nuggsforcarter