去外國旅行呢，有人鍾意住青年旅舍，貪佢夠平；有人鍾意住民宿，貪佢夠warm；當然最多人係揀住酒店啦，貪佢有room service，日日有員工幫自己執房吖嘛～酒店成日都將「家的感覺」、「賓至如歸」呢啲掛喺口邊，其實去酒店只係瞓嗰幾晚，邊有人真係當自己屋企㗎？用完嘅毛巾梗係周圍飛、被又唔摺咁，等職員嚟執㗎啦～
但你有冇諗過，如果善待幫你做room service嘅職員，原來都係一件好開心嘅事呢？外國就有個網民喺出差嘅時候，日日都用被舖或者毛巾砌唔同公仔嚟同酒店職員互動喇～
第一日
第一日，佢就砌咗個人仔出嚟，睇佢隻手拎住個遙控，唔知係咪睇電視睇到瞓著咗呢？
而清潔員工除咗幫佢消滅咗個人仔（即係摺返好張被）之外，仲用memo留咗個微笑畀佢呀！
第二日
你留微笑，我就一於整個大笑畀你！而清潔員工今日就留咗個瞇眼笑畀佢喇，睇嚟真係好似哈姆太郎咁，一日開心過一日啵！
第三至五日
呢個諗頭多多嘅客人唔止用被舖同毛巾呀，仲出動埋廁所入面嘅杯墊同沖涼液，砌咗隻不知名怪獸出嚟！然後又有疑似企鵝同埋棕梠樹，嘩，砌得咁似，係咪偷偷地練咗十幾年，等一個畀世人讚賞嘅機會呀？
清潔員工見到呢個客人咁得意，梗係開心啦，仲留咗兩個微笑同OK畀佢?～
第八日（係唔知點解冇第六七日啲相嘅，可能佢冇idea整咩公仔啦）
連車仔都砌到，加埋手繪人仔，係有童真嘅！
清潔員工就喺紙仔上面話多謝個客人令佢好開心喇，話唔定佢而家日日都好期待返工執呢間房啵！
第九至十日
你以為砌咗咁多日，個客人就會諗到乾曬塘呀？傻啦，佢又砌咗隻厚嘴唇怪同著浴衣嘅假人喇！
可能受到呢個客人影響啦，今日清潔員工就唔單止寫字或者畫簡單微笑喇，佢都畫咗隻公仔喺memo度呀～
最後一日
天氣不似預期，但要走，總要飛～客人終於都要走喇，於是就砌咗個心心畀清潔員工，仲留底咗少少朱古力，多謝呢個員工陪佢度過咗咁warm嘅十日。雖然佢哋兩個冇真係見過面，但又有互相陪伴嘅感覺，諗落都幾似《你的名字。》喎？唔知個客人會唔會一個人嚟，最後兩個人走呢？
封面圖片、資料來源連結：22words
