開心影相，唔開心影相；好天影相，唔好天都要影相。無論咩時候，妹豬都會搵到影相嘅理由。除咗幫手影相嘅男朋友或者兵仔，最無奈嘅咪就係妹豬養嘅寵物囉。

冇計啦，要呃多啲like，一係就要有美食，一係就要有得意嘅毛孩。美食唔係時時有，但毛孩就總會喺主人左近㗎嘛！妹豬咪唯有捉住佢哋瘋狂影相囉！

好似外國呢個靚女妹豬咁，喺Prom呢個大日子著到咁靚又化到咁行妝，梗係要影多幾幅相㗎啦～於是就喺出門口之前捉埋自己隻狗狗係咁影，影到滿意為止嘞～

主人你就開心，難為狗狗生無可戀咁嘅款呀⋯⋯妹豬，你放開狗狗啦，咀咀相呢啲粗重嘢交畀毛毛幫你啦！

「你放過我啦，我唔想影呀汪！」

下一張相汪汪已經開始想逃離主人嘅魔爪喇，妹豬見到狗狗咁嘅樣都皺晒眉呀⋯⋯狗狗，你使唔使咁呀，話晒你主人都叫靚女一名吖！算啦主人，狗狗唔同你影啫，仲有大把毒L排住隊等你㗎～放狗，放開所有啦⋯⋯

「我汪你呀！我講咗幾汪多次呀！我唔汪想影呀八婆！」

係咪呢？話咗你㗎啦，出事㗎嘛！妹豬點都估唔到狗狗竟然唔想影相到暴走呀，仲要由平日個可愛樣變到咁猙獰，主人你究竟捉佢影相影咗幾耐呀？

Close up睇下，狗狗呢個完全就係「你大我呀！」呢個樣呀，潛力圖嚟㗎喎！妹豬話平日佢一作狀咀咀，狗狗就會舔佢㗎喇，點知今次會搞成咁喎⋯⋯

好彩妹豬最後都同狗狗影到一幅似樣嘅相留念。不過狗狗好似都係唔多滿意咁囉～梗係啦，主人你自己著到咁靚，又唔幫狗狗裝下身先影，啲相Share出去，狗狗會畀啲狗友笑㗎嘛！下次唔好咁啦知道未？

封面圖片及資料來源：BothwellKaycee／twitter