細細個最怕畀人知自己瀨尿，你知啦，好瘀㗎嘛～喺屋企瀨都好啲，最多畀阿媽話兩句啫。但係如果喺學校上上下堂先嚟瀨，咁咪迫住要舉手同老師講囉，一講就實畀全班同學笑到面都黃啦！落去搵校工叔叔姨姨借校服換嗰陣又要畀人笑多次，真係好慘慘豬㗎！

特別係女仔，話晒面皮薄啲㗎嘛，畀人咁笑法真係會爆喊㗎⋯⋯好似相入面呢個咁打耳嘅妹妹，佢返幼稚園嗰陣居然瀨咗殊殊呀！今次真係醜死鬼喇！於是妹妹就好唔開心，唔肯留喺課室，扭住話要返屋企嘞⋯⋯

老竇一收到學校電話知道寶貝女發生咗咁嘅事，梗係狗衝去接佢放學啦！要氹返囡囡開心就梗㗎喇，不過佢認為與其講一堆廢話氹個女，不如行動仲實際啦！

老竇為咗令個女覺得瀨尿唔係真係咁羞恥嘅一件事，居然整濕個褲襠先去接囡囡，等女女覺得大人都會瀨尿啦，咁小朋友瀨尿好小事啫～最緊要係有咩事都有爸爸陪你！老竇咁做真係又型又Man呀！

老竇玩到咁大，囡囡見到梗係即刻笑返啦～話晒係老竇嘅前世情人，係唔同啲嘅，換轉瀨咗殊殊個個係囝囝，唔知老竇又會唔會做啲咁冧嘅嘢呢下？

封面圖片及資料來源：LucindaSowards／twitter