嚟自俄羅斯嘅死亡遊戲「藍鯨」（Blue Whale），相信大家都聽過。喺遊戲入面，玩家每日都要完成唔同嘅任務，好似每日凌晨4：20起身、喺手上用刀片?出藍鯨等等，而最後就係要自殺。呢個遊戲聽落好荒謬，但事實上喺俄羅斯已經令到超過一百個年青人輕生。

（下有血腥圖片，慎睇。）

開始遊戲之前，玩家要將屋企地址同裸照send畀藍鯨嘅admin，如果玩家想中棄放棄，就會被公開裸照或者畀人搵上門，亦有唔少玩家因為擔心連累屋企人而被迫繼續落去。

雖然藍鯨遊戲創辦人Philip Budeikin已經被捕，但係呢個死亡遊戲嘅風潮並未停止，近日更加有傳入香港嘅謠傳。

前日，喺Facebook page「名校 Secrets」有學生話最近見到有三個朋友都post咗「#iamawhale」呢個hashtag，但問佢哋呢句說話有咩意思嘅時候，佢哋只係懶神秘唔肯講。點知隔咗幾日，就見到呢三個朋友嘅左手都不約而同咁包紥住，好似受咗傷咁，所以認為佢哋玩緊自殘。有唔少網民都認為呢三個朋友進行緊藍鯨嘅自殘任務，好擔心佢哋最後會出事。

呢個遊戲能夠令咁多後生仔自殘甚至自殺，影響力真係唔可以睇小，大家千祈唔好因為好奇或者想挑戰自己而嘗試，另一方面，如果見到身邊有人post同藍鯨有關嘅hashtag、或者身體出現神秘傷口，都唔好怕人覺得你多事，多啲關心下佢，同埋將事件話畀信任嘅人聽呀。

封面圖片、資料來源連結：名校 Secrets、higgypop