【都幾襯吖】點解阿媽兩星期都仲未發覺屋企張相換咗做金仔嘅?

「阿媽─我返嚟喇!我對拖鞋呢!」

「阿媽─食得飯未呀!」

「阿媽─個熱水爐唔熱嘅?!」

屋企事無大小,無論搵唔到對襪(明明應該自己執)定盒牛奶飲晒(擺明即係叫阿媽買),我哋都一定第一時間大叫阿媽嘅,點解?因為覺得阿媽夠晒細心,全屋嘅嘢佢都無微不至咁看實晒吖嘛!不過原來再細心嘅阿媽,都有走漏眼嘅一日㗎!

圖片來源:Slatez_/twitter

咦,呢個咪金仔?!好耐冇見喇啵,肥咗又瘦咗,型咗威咗仲疊馬咗𠻹!掛咁大幅金仔像喺牆上面,唔通呢個係一個北韓家庭嚟?

圖片來源:Slatez_/twitter

原來呢個唔係一個關於北韓人民有幾敬重金仔嘅故事,而係一個死仔包點樣整蠱阿媽嘅故事至真……話說阿仔有日食飽飯冇sss屙,於是將屋企幅牆上面張相換咗就世紀美男金仔,點知阿媽過咗足足兩個禮拜咁耐都仲未發覺囉!定係阿媽覺得金仔個樣夠晒威嚴,擺喺屋企驅邪都唔錯,所以先唔出聲咋?

圖片來源:twitter

金仔咁受全宇宙歡迎,呢次又點會係佢第一次畀人擺上牆呢?之前都試過有網民偷偷地將FD子屋企嘅相換咗做金仔㗎喇,仲要成四個月都冇人發現𠻹!相信好快全世界都係屬於金仔㗎喇,你仲唔嗱嗱聲check下銀包入面個南韓oppa變咗北韓金仔?

 

 

封面圖片、資料來源連結:Slatez_/twitter

同場加映:【整蠱專家】家姐3日都仲未發現我將金魚換咗做紅蘿蔔呀

 

毛記電視網站 · 版權所有 · 不得轉載 Copyright © TVMOST.COM.HK All rights reserved